Selasa, 23 Agustus 2016

PROGRAMA ABERTURA ENSINO PRÉ-ESCOLAR NOSSA SENHORA DE LOURDES BIACOU



Sorumutu entre sekretario Jeral fundasaun ho Xefe-Suku Aidaba-leten, Xefe-Aldeia Biacou ho Professor sira husi Biacou kona ba programa abertura Pre-escolar

Iha loron segunda feira 22/08/2019 Fundação Sagrado Coração de Jesus hala’o programa abertura ba Ensino Pré-Escolar Nossa Senhora de Lourdes Biacou. Iha programa ida ne’e marka mos prezensa husi Secretario Geral Fundação Sagrado Coração de Jesus ho Nia Ekipa, Xefe-Suku Aidaba-Leten, Xefe-Aldeia Biacou, Diretor Jeral ensino Básico St. Arnold Janssen, koordenador da escola, Professor sira husi Ensino Básico Biacou no Inan Aman sira. Iha programa ida ne’e hahu ho introdusaun husi Diretor jeral Ensino Básico Biacou, xefe-Suku Aidaba-Leten no Sekretario Jeral Fundasaun nian ne’ebe maka  koalia liu kona ba oinsa maka atu bele lansa ona eskola Pré-escolar iha fatin ida ne’e no hari’i ona Edifisiu eskola foun iha tempu badak nia laran tamba proposta ne’ebe maka hato’o husi komunidade sira husi Biacou, ne’ebe maka  iha inisiativa atu loke Ensino Pré-Escolar foun ne’e hetan ona aprova husi governu no agora dadauk Governo  mos apoio ona orsamentu merenda escolar no orsamentu hirak ne’e tama ona iha Fundação SJC Maliana. Tamba ne maka wainhira Diretor jeral Ensino básico St. Arnold Janssen Sr. Simão Laku Suli hato’o informasaun hirak ne’e ba Prezidente Fundasaun iha dia 16 de Agostu liu ba, prezidente hatete katak se proposta ne’e governu aprova ona maka ita tenki lansa ona eskola  ne’e no harii ona edifisiu foun ba ensino pré-escolar tamba osan merenda eskolar mos tama ona mai, se ita la harii eskola ne maka ita tenki fo fila fali Governu nia osan. “Iha dia 16 de Agostu liu ba hau to’o iha fundasaun Maliana, Amo dehan hanesan ne’e, sr. imi sira ne’e halo ita nia ulun moras, Amo hirus ituan tamba proposta ne’e la tuir prosedimentu ne’ebe maka hatuur iha estatuto ne’e rasik, e hau mos hanoin katak se proposta ne’e governu aprova  , orsamentu mos mai ona, hau mos sente tauk se kuando eskola ne’e la realiza, ne’e ema bele dehan ita ne bosok ten, se wainhira  proposta ne’e aprova ona entaun eskola ne’e mos tenki realiza ona.  Tamba ne’e maka Fundasaun orienta kedas hau, dehan katak tenki komesa fo sai ona  ba alunos sira atu aprezenta sira nia naran iha tempu badak” tenik Sr. Simão Laku Suri Diretor Jeral St. St. Arnold Janssen nia mos hatutan tan katak  Pre-escolar maka sai determinante ba ensino baziku, pre-escolar maka hanesan baze fatuk inan atu lori ba ensino baziku, ne’e duni ensino pre-escolar ne’e tenki tau importansia ne’ebe aas liu. Iha fatin hanesan Sekretario Geral Fundação SCJ Sr. Fridolino G. Soares hateten katak “Imi nia proposta ida ne’e klaru halo ami iha fundasaun ulun halai tia. Babain kuando atu loke eskola tuir estatuto fundasaun ne’e tenki ho autorizasaun Bispo nian, bazeia ba rekomendasaun mai sekretariado, como imi nia proposta ne’e direta iha momentu ne’e konhecimento deit  iha fundasaun depois direta ba nasional, ami simu ona proposta ne ho objectivo tinan oin maka foin loke eskola ne’e maibe problema mai maka, foin lalais iha fornesimento iha merenda eskolar, eskola ne nia naran tama hotu tia ona, entaun hakarak ou lakoi ita tenki lansa ona eskola ne’e depois mak neneik ita kria  nia edifisiu, material ho fasilidade eskola nian, Se lae ita tenki fo fila fali osan ne ba governu” Sr. Fridolino mos hatutan tan katak proposta ne’ebe halo sees ona husi prosedimento ne’ebe hatuur iha nia estatuto rasik. Babain kuando atu loke eskola ne’e ekipa ida tun ba, hodi halo estudo viabilidade/estudi kelayakan katak fatin nee merese duni atu aumenta tan eskola ka lae, e depois bazeia ba sira nia rezultado estudo ne maka tenki loke entaun ami halo carta rekomendasaun ida ba Amo Bispo. Amo Bispo hasai despacho e depois bazeia ba despacho ne’e maka  ita hato’o ba Governu katak ami atu loke tan eskola. Atu nune’e ita bele justifika wanhira Governu husu razaun saida maka ita loke eskola ne, ita iha tiha ona estudu viabilidade ne’ebe atu justifika ba sira atu garante katak fatin ne’e merese duni loke eskola.
Maibe tamba Fundasaun iha ona komitmentu bo’ot katak Fundasaun rekoñese no konsidera ita bo’ot sira nia esforso an atu hari’i eskola ida ne’e no ida ne’e Fundasaun kontente tebes. “Iha komunidade barak, ami tama iha fatin barak ne’ebe maka ami vizita, iha komunidade uitoan deit maka tau interese bot ba edukasaun. Maibe iha Biacou inan aman sira iha inisiativa rasik, hodi imi nia oan sira mai rejista naran tau iha proposta lori ba, depois governo aprova. Bazeia ba razaun ida ne’e maka Fundasaun nakloke an, katak atu urgente mos ita hare,ami konsidera ita bot sira nia ideias, komitmentu hanesan eskola sira seluk ne’ebe maka agora dadauk Fundasaun loke. Ne’ebe agora dadauk ita lansa eskola ida ne’e, depois Fundasaun sei esforsa an iha tempu badak , ita sei presija harii edifisiu eskola foun, buka professores sira ne’ebe maka diak atu bele hanorin labarik sira ho diak. Presiza fo formasaun/kapasitasaun ba professor sira atu aprende tan kona ba pedagogika ho metodologia. Presiza professor sira ne’ebe maka iha pasiensia atu  bele hanorin labarik sira” tenik Sekretario Jeral iha Fatin refere. Iha programa ida ne’e Xefe do Suku Aidaba – leten Sr. Alberto mos fo agaradese no parabens ba Fundasaun “hau fo parabens ba Fundação Sagrado Coração de Jesus ne’ebe laran nakloke simu ami nia proposta ao mesmo tempu hatutan proposta ba Nasional e aprova to’o ohin loron hetan rezultado ne’ebe pozitivu teb-tebes entaun hatudu sinal pozitivu ida liliu mai ita inan-aman para atu kria kooperasaun diak ba nivel edukasaun, atu dudu ita nia oan sira liu husi eskola ida ne’ebe maka fundasaun atu loke ne maka ensino pre-escolar”. Xefe-suku mos hatutan tan katak politika ne’ebe maka governu kria no politika ne’ebe maka fundasaun kria ne’e tulun tebes ita iha setor edukasaun, nebe ejiji ita inan aman sira, atu fo kontribuisaun nebe pozitivu. Edukasaun tenke sai hanesan fotores determinante no  prioridade ba dezemvolvimentu iha ita nia rain e  nasaun. Governu bele kria politika ba dezemvolvimentu bar-barak maibe se laiha rekursus umanus diak, ita sei la atinji buat nebe ita mehi ba ita nia rain. Hau nia mensazem ikus maka ita hotu tenki buka atu  kolabora ho fundasaun, professor/a, koordenador, autoridade lokal liliu xefe suku, xefe aldeai, Lideransa lokal para bele lori  prosperiedade ba edukasaun iha Munisipio Bobonaro  no  ita nia Diocese ne ba futuru.

1 komentar:

  1. Great blog!!

    If you like, come back and visit mine:
    http://albumdeestampillas.blogspot.com

    Thanks,
    Pablo from Argentina

    BalasHapus